2019 August 18 Sunday
തെറ്റു ചെയ്യുന്നവന്‍ മനുഷ്യനാണ്; അതിനെക്കുറിച്ചോര്‍ത്തു ദു:ഖിക്കുന്നവന്‍ മഹര്‍ഷിയാണ്; എന്നാല്‍ അതില്‍ അഭിമാനം കൊള്ളുന്നവന്‍ പിശാചാണ്.

അധികാരത്തിലെത്തിയപ്പോള്‍ തൊഴിലാളികളെ മറക്കുന്ന സമീപനമാണ് എല്‍.ഡി.എഫ് സര്‍ക്കാരിന്റേത്: വി.എസ് ശിവകുമാര്‍

തിരുവനന്തപുരം: അധികാരത്തില്‍ വന്നപ്പോള്‍ തൊഴിലാളികളെ മറക്കുന്ന സമീപനമാണ് എല്‍.ഡി.എഫ് സര്‍ക്കാരിന്റേതെന്നും കെ.എസ്.ആര്‍.ടി.സിയുടെ ചരിത്രത്തിലെ ഏറ്റവും വലിയ നഷ്ടമാണ് ഇപ്പോള്‍ സംഭവിച്ചിട്ടുള്ളതെന്നും വി.എസ് ശിവകുമാര്‍ എം.എല്‍.എ പറഞ്ഞു. കേരള സ്റ്റേറ്റ് ട്രാന്‍സ്‌പോര്‍ട്ട് വര്‍ക്കേഴ്‌സ് യൂണിയന്‍ (ഐ.എന്‍.ടി.യു.സി) 64-ാം വാര്‍ഷിക സമ്മേളനം തിരുവനന്തപുരത്ത് ഉദ്ഘാടനം ചെയ്യുകയായിരുന്നു അദ്ദേഹം.
തൊഴിലാളികളെ പിരിച്ചുവിടുകയും സര്‍വിസുകള്‍ നിര്‍ത്തുകയും ചെയ്ത് സ്വകാര്യ ബസ് മുതലാളിമാരെ സംരക്ഷിക്കുന്ന നയമാണ് സര്‍ക്കാരിന്റേത്. പിരിച്ചുവിട്ട എം. പാനല്‍ ജീവനക്കാര്‍ക്ക് തൊഴില്‍ സുരക്ഷ നല്‍കാന്‍ കഴിയുമായിരുന്നു. എന്നാല്‍ അതിനുള്ള ശ്രമം സര്‍ക്കാരിന്റെ ഭാഗത്തുനിന്ന് ഉണ്ടായില്ല. പുതുതായി ഒറ്റ ബസും നിരത്തിലിറക്കാന്‍ ഈ സര്‍ക്കാരിനായിട്ടില്ല. ഇലക്ട്രിക്ക് ബസ് പുറത്തിറക്കാനുള്ള തലതിരിഞ്ഞ തീരുമാനമാകട്ടെ, കനത്ത നഷ്ടം വരുത്തിവയ്ക്കുകയും ചെയ്തു. യു.ഡി.എഫ് ഭരണകാലത്ത് ജീവനക്കാര്‍ക്കുള്ള ഡി.എ ഏറെക്കുറെ കൊടുത്തുതീര്‍ത്തതാണ്. പുതിയ സര്‍ക്കാര്‍ വന്നതോടെ ജീവനക്കാര്‍ വീണ്ടും ദുരിതത്തിലായെന്നും ശിവകുമാര്‍ പറഞ്ഞു.
യൂനിയന്‍ സംസ്ഥാന പ്രസിഡന്റ് തമ്പാനൂര്‍ രവി അധ്യക്ഷനായിരുന്നു. എം.വിന്‍സെന്റ് എം.എല്‍.എ, മുന്‍ സ്പീക്കര്‍ എന്‍.ശക്തന്‍, ഡി.സി.സി പ്രസിഡന്റ് നെയ്യാറ്റിന്‍കര സനല്‍, യൂനിയന്‍ ജന. സെക്രട്ടറി ആര്‍.ശശിധരന്‍ സംസാരിച്ചു. യൂനിയന്‍ സംസ്ഥാന വൈസ് പ്രസിഡന്റ് ഇ.കെ ജോര്‍ജ് സ്വാഗതവും സംസ്ഥാന സെക്രട്ടറി ആര്‍.അനില്‍കുമാര്‍ നന്ദിയും പറഞ്ഞു. സമ്മേളനം ഇന്ന് അവസാനിക്കും.


ഏറ്റവും പുതിയ വാർത്തകൾക്കും വീഡിയോകൾക്കും സബ്‌സ്ക്രൈബ് ചെയ്യുക

കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.